ବିଜେପି ବିରୋଧୀ ସାମ୍ମୁଖ୍ୟ ପାଇଁ ପ୍ରସ୍ତୁତି ! ଉଦ୍ଧବ ଠାକରେଙ୍କୁ ଭେଟିଲେ ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର୍

ମୁମ୍ବାଇ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଲଗାତାର ଆକ୍ରମଣ ପରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଆଜି ତାଙ୍କ ମହାରାଷ୍ଟ୍ର ପ୍ରତିପକ୍ଷ ତଥା ଶିବସେନା ମୁଖ୍ୟ ଉଦ୍ଧବ ଠାକରେ ଏବଂ ଏନସିପି ସଭାପତି ଶରଦ ପାୱାରଙ୍କୁ ଭେଟିଛନ୍ତି। ୨୦୨୪ ସାଧାରଣ ନିର୍ବାଚନରେ ​​ବିଜେପିର ମୁକାବିଲା କରିବା ପାଇଁ ଏକ ଅଣକଂଗ୍ରେସ ସାମ୍ମୁଖ୍ୟ ଗଠନ ପାଇଁ ଏହି ବୈଠକକୁ ଏକ ପ୍ରୟାସ ବୋଲି କୁହାଯାଉଛି । ଏହି ଲକ୍ଷ୍ୟରେ ତେଲେଙ୍ଗାନାର ମୁଖ୍ୟମନ୍ତ୍ରୀ ଆଞ୍ଚଳିକ ଦଳର ନେତାଙ୍କୁ ଭେଟିବା ଜାରି ରଖିଛନ୍ତି ।

ତେଲେଙ୍ଗାନା ରାଷ୍ଟ୍ରିୟ ସମିତି ସୂତ୍ରରୁ ଜଣାପଡିଛି ଯେ ଉଦ୍ଧବ ଠାକରେ ମୁଖ୍ୟମନ୍ତ୍ରୀ ରାଓଙ୍କୁ ମଧ୍ୟାହ୍ନ ଭୋଜନ ପାଇଁ ନିମନ୍ତ୍ରଣ କରିଥିଲେ। ଏହା ପରେ ସେ ଶରଦ ପାୱାରଙ୍କୁ ଭେଟିବେ | ମୁମ୍ବାଇର ବିଭିନ୍ନ ସ୍ଥାନରେ ତେଲେଙ୍ଗାନା ମୁଖ୍ୟମନ୍ତ୍ରୀଙ୍କୁ ସ୍ୱାଗତ ଜଣାଇ ବଡ଼ ବଡ଼ ପୋଷ୍ଟର ଲଗାଯାଇଛି। ଏହି ପୋଷ୍ଟରରେ ତେଲେଙ୍ଗାନା ମୁଖ୍ୟମନ୍ତ୍ରୀ ରାଓ, ଉଦ୍ଧବ ଠାକରେ, ଶରଦ ପାୱାର ଏବଂ ଶିବସେନା ପ୍ରତିଷ୍ଠାତା ବାଲ ଠାକରେଙ୍କ ଫଟୋ ରହିଛି।

ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓଙ୍କ କାର୍ଯ୍ୟାଳୟ ଅନୁଯାୟୀ- ଠାକରେ ଗତ ସପ୍ତାହରେ ତାଙ୍କୁ ମୁମ୍ବାଇ ଆସିବାକୁ ନିମନ୍ତ୍ରଣ କରିଥିଲେ। ବିଜେପିର ଲୋକ ବିରୋଧୀ ନୀତି ବିରୋଧରେ ତାଙ୍କର ‘ସଂଗ୍ରାମ’କୁ ସମର୍ଥନ ମଧ୍ୟ ଜଣାଇଥିଲେ।

ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କହିଛି ଯେ ଦେଶକୁ ବିଭାଜନକାରୀ ଶକ୍ତିରୁ ରକ୍ଷା କରିବା ପାଇଁ ରାଓ ଠିକ୍ ସମୟରେ ସ୍ୱର ଉଠାଇଛନ୍ତି। ତେଲେଙ୍ଗାନା ମୁଖ୍ୟମନ୍ତ୍ରୀ ରାଓଙ୍କ ସହ ତାଙ୍କ ଝିଅ ଏବଂ ଏମଏଲସି କେ.କବିତା ଏବଂ ଦଳର ସାଂସଦ ଜେ ସନ୍ତୋଷ କୁମାର, ରଣଜିତ ରେଡ୍ଡୀ ଏବଂ ବିବି ପାଟିଲ ମଧ୍ୟ ମୁମ୍ବାଇ ଗସ୍ତରେ ଅଛନ୍ତି।