ଇତିହାସ ରଚିଲା ମୁମ୍ବାଇ ଇଣ୍ଡିଆନ୍ସ, ବିଶ୍ୱର ପ୍ରଥମ ଦଳ ଭାବେ ଜିତିଲା ୧୫୦ ଟି-୨୦ ମ୍ୟାଚ୍

ମୁମ୍ବାଇ: କ୍ରମାଗତ ତିନୋଟି ପରାଜୟ ପରେ ମୁମ୍ବାଇ ଇଣ୍ଡିଆନ୍ସ ଚଳିତ ଆଇପିଏଲରେ ବିଜୟ ଖାତା ଖୋଲିଛି । ରବିବାର ଅନୁଷ୍ଠିତ ଏକ ହାଇସ୍କୋରିଂ ମ୍ୟାଚରେ ଦିଲ୍ଲୀ କ୍ୟାପିଟାଲ୍ସକୁ ୨୯ ରନରେ ହରାଇ ଶେଷରେ ବିଜୟ ସ୍ବାଦ ଚାଖିଛି ହାର୍ଦ୍ଦିକ ପାଣ୍ଡ୍ୟାଙ୍କ ମୁମ୍ବାଇ ଇଣ୍ଡିଆନ୍ସ । ଏହି ବିଜୟ ସ‌ହ ଦଳ ଇତିହାସ ରଚିଛି। ଟି-୨୦ କ୍ରିକେଟରେ ମୁମ୍ବାଇ ଇଣ୍ଡିଆନ୍ସର ଏହା ହେଉଛି ୧୫୦ ତମ ବିଜୟ। ବିଶ୍ବର ପ୍ରଥମ ଦଳ ଭାବେ ମୁମ୍ବାଇ ଇଣ୍ଡିଆନ୍ସ ଏହି ମାଇଲଖୁଣ୍ଟ ଛୁଇଁଛି । ଟି-୨୦ କ୍ରିକେଟରେ ସର୍ବାଧିକ ବିଜୟ ହାସଲ କରିଥିବା ଦଳ ତାଲିକାରେ ଆଉ ଏକ ସଫଳ ଆଇପିଏଲ୍ ଟିମ୍ ଚେନ୍ନାଇ ସୁପର କିଙ୍ଗ୍ସ ଦ୍ୱିତୀୟ ସ୍ଥାନରେ ରହିଛି | ଚେନ୍ନାଇ ସୁପର କିଙ୍ଗ୍ସ ଟି-୨୦ କ୍ରିକେଟରେ ମୋଟ ୧୪୮ଟି ମ୍ୟାଚ୍ ଜିତିଛି | ଭାରତୀୟ ଦଳ ୧୪୪ ବିଜୟ ସହ ତୃତୀୟ ସ୍ଥାନରେ ଅଛି ।

ଓ୍ବାଙ୍ଖେଡେ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ମୁମ୍ବାଇ ଇଣ୍ଡିଆନ୍ସ ପ୍ରଥମେ ବ୍ୟାଟିଂ କରି ପାଞ୍ଚ ୱିକେଟ୍ ହରାଇ ୨୩୪ ରନର ବିଶାଳ ସ୍କୋର୍ କରିଥିଲା। ଏହାର ଜବାବରେ ରିଷଭ ପନ୍ତଙ୍କ ଦିଲ୍ଲୀ କ୍ୟାପିଟାଲ୍ସ ୮ ୱିକେଟରେ ୨୦୫ ରନ୍ କରିବାକୁ ସକ୍ଷମ ହୋଇଥିଲା। ତିନୋଟି ପରାଜୟ ପରେ ଏହା ମୁମ୍ବାଇର ପ୍ରଥମ ବିଜୟ ହୋଇଥିବାବେଳେ ପାଞ୍ଚଟି ମ୍ୟାଚରେ ଦିଲ୍ଲୀର ଚତୁର୍ଥ ପରାଜୟ। ଏହି ପରାଜୟ ସହିତ ଦିଲ୍ଲୀ ପଏଣ୍ଟ ଟେବୁଲର ସବା ଶେଷକୁ ଖସିଛି।