ଟୋକିଓ: ଲୋକପ୍ରିୟ ଗାଣିତିକ ଖେଳ ‘ସୁଡୋକୁ’ର ଜନକ ଭାବରେ ଜଣାଶୁଣା ମାକି କାଜିଙ୍କର ୬୯ ବର୍ଷ ବୟସରେ ଦେହାନ୍ତ ହୋଇଯାଇଛି। ତାଙ୍କ ଦ୍ବାରା ସୃଷ୍ଟ ଗଣିତର ପଜଲ୍ ଖେଳ ‘ସୁଡୋକୁ’କୁ ବିଶ୍ବରେ ଦୈନିକ ଲକ୍ଷ ଲକ୍ଷ ଲୋକ ଖେଳନ୍ତି | ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ମାକି କାଜୀ ଜଣେ ବିଶ୍ୱବିଦ୍ୟାଳୟ ଡ୍ରପଆଉଟ୍ ଥିଲେ ଯିଏ ନିଜର ଏହି ପ୍ରହେଳିକା ଖେଳରେ ସମଗ୍ର ବିଶ୍ୱକୁ ନିମଗ୍ନ କରିଦେଇଥିଲେ।
ସେ ଜାପାନର ଏକ ପ୍ରିଣ୍ଟିଂ କମ୍ପାନୀରେ କାମ କରୁଥିଲେ | ପରେ ସେ ନିଜର ଏକ ପତ୍ରିକା ଆରମ୍ଭ କରିଥିଲେ, ଯେଉଁଠି ପ୍ରଥମେ ‘ସୁଡୋକୁ’ ପ୍ରକାଶିତ ହୋଇଥିଲା । ମାକି କାଜି ତାଙ୍କ ଖେଳର ନାମକରଣ କରିବା ପଛରେ ଏକ ରୋଚକ କାହାଣୀ ମଧ୍ୟ ଅଛି | ବାସ୍ତବରେ, ଜାପାନୀ ଭାଷାରେ ‘ସୁଡୋକୁ’ ଅର୍ଥ ହେଲା ପ୍ରତ୍ୟେକ ସଂଖ୍ୟା ଏକକ ହେବା ଜରୁରୀ | ସେ ଏହାକୁ ୮୦ ଦଶକର ମଧ୍ୟଭାଗରେ ତିଆରି କରିଥିଲେ | ଏହି ଖେଳରେ ପୁନରାବୃତ୍ତି ନକରି ଧାଡି, ସ୍ତମ୍ଭ ଏବଂ ବ୍ଲକ୍ ଗୁଡ଼ିକୁ ୧ ରୁ ୯ ପର୍ଯ୍ୟନ୍ତ ଭରିବାକୁ ହୁଏ |
୨୦୦୪ରେ ଏକ ନ୍ୟୁଜିଲାଣ୍ଡର ଜଣେ ପ୍ରଶଂସକ ଏହାକୁ ବ୍ରିଟିଶ ଖବରକାଗଜ ‘ଦି ଟାଇମ୍ସ’ରେ ପ୍ରକାଶ କରିବା ପରେ ସୁଡୋକୁ ବିଶ୍ୱ ସ୍ତରରେ ଆଦୃତ ହେବାରେ ଲାଗିଲା । କାଜି ଜୁଲାଇ ପର୍ଯ୍ୟନ୍ତ ତାଙ୍କ ପଜଲ୍ କମ୍ପାନୀ ନିକୋଲାଇ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଥିଲେ। ସେ ଅଗଷ୍ଟ ୧୦ରେ ମିତାକାରେ ମୃତ୍ୟୁ ବରଣ କରିଛନ୍ତି। ସେ ବହୁ ଦିନରୁ ପାକସ୍ଥଳୀ କର୍କଟ ରୋଗରେ ପୀଡ଼ିତ ଥିଲେ।
ନିକୋଲାଇ ଅନୁଯାୟୀ, ମାକି ୩୦ରୁ ଅଧିକ ଦେଶ ଭ୍ରମଣ କରି ନିଜର ପଜଲ୍ ଖେଳର ପ୍ରସାର ଓ ପ୍ରଚାର କରିଥିଲେ। ବର୍ଷେ ମଧ୍ୟରେ ୧୦୦ ଟି ଦେଶରୁ ୨୦ କୋଟି ଲୋକ ସୁଡୋକୁ ଚାମ୍ପିଅନସିପରେ ଅଂଶଗ୍ରହଣ କରିଥିଲେ |
Comments are closed.