ଇମ୍ରାନ ଖାନଙ୍କ ବିରୋଧରେ ଅନାସ୍ଥା ପ୍ରସ୍ତାବ ଉପରେ ଆଜି ପାକିସ୍ତାନ ସଂସଦରେ ଆଲୋଚନା , ଷଡ଼ଯନ୍ତ୍ର ଅଭିଯୋଗକୁ ଆମେରିକାର ଖଣ୍ଡନ

ନୂଆଦିଲ୍ଲୀ: ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ବିରୋଧରେ ଅନାସ୍ଥା ପ୍ରସ୍ତାବ ଉପରେ ଆଜି ପାକିସ୍ତାନ ସଂସଦରେ ଆଲୋଚନା ହେବ। ଆଲୋଚନା ଅପରାହ୍ନ ୪ଟାରୁ ଆରମ୍ଭ ହେବ | ନିକଟରେ ନ୍ୟାସନାଲ ଆସେମ୍ବ୍ଲିରେ ବିରୋଧୀ ଦଳର ନେତା ଶାହବାଜ ସରିଫ ଇମ୍ରାନ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିଥିଲେ। ରିପୋର୍ଟ ଅନୁଯାୟୀ ଇମ୍ରାନ ଖାନ ସରକାରଙ୍କ ପାଖରେ ଏବେ ମାତ୍ର ୧୪୦ ଜଣ ସାଂସଦ ଥିବାବେଳେ ବିରୋଧୀଙ୍କ ୧୯୬ ଜଣ ସାଂସଦ ଅଛନ୍ତି। ଏଥିମଧ୍ୟରେ ଇମ୍ରାନଙ୍କ ଦଳର ଅନେକ ବିଦ୍ରୋହୀ ସାଂସଦ ଅଛନ୍ତି।

ନ୍ୟାସନାଲ ଆସେମ୍ବ୍ଲିରେ ଏକ ଅନାସ୍ଥା ପ୍ରସ୍ତାବ ପାରିତ କରିବାକୁ ୧୭୨ ସାଂସଦଙ୍କ ସମର୍ଥନ ଆବଶ୍ୟକ | ଏହି ସମୟରେ ପାକିସ୍ତାନର ରାଜନୈତିକ ପାଣିପାଗ ଦ୍ରୁତ ଗତିରେ ବଦଳୁଛି। ବୁଧବାର ସନ୍ଧ୍ୟାରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଦେଶକୁ ସମ୍ବୋଧିତ କରିବାର ଥିଲା । କିନ୍ତୁ ପାକିସ୍ତାନୀ ସେନା ମୁଖ୍ୟ ଜେନେରାଲ କମାର ଜାଭେଦ୍ ବାଜୱାଙ୍କୁ ଭେଟିବା ପରେ ଦେଶକୁ ତାଙ୍କ ସମ୍ବୋଧନ ସ୍ଥଗିତ ରଖିଥିଲେ ଇମ୍ରାନ। ଅନ୍ୟପକ୍ଷରେ ଇମ୍ରାନ ଖାନଙ୍କ ସରକାର ଭାଙ୍ଗିବାକୁ ବିଦେଶୀ ଷଡ଼ଯନ୍ତ୍ର ରହିଛି ବୋଲି ମଧ୍ୟ ଚର୍ଚ୍ଚା ଜୋର ଧରିଛି। ବିରୋଧୀ ଏହାକୁ ଇମ୍ରାନଙ୍କ ରଣନୀତି ବୋଲି କହୁଛନ୍ତି ।

ଇତି ମଧ୍ୟରେ ପାକିସ୍ତାନୀ ଖବରକାଗଜ ‘ଡନ୍’ର ଏକ ରିପୋର୍ଟରେ କୁହାଯାଇଛି ଯେ ଇମ୍ରାନଙ୍କୁ ହଟାଇବା ପାଇଁ ଷଡ଼ଯନ୍ତ୍ର ନେଇ ଅଭିଯୋଗକୁ ଆମେରିକା ବୈଦେଶିକ ବ୍ୟାପାର ବିଭାଗ ଅସ୍ୱୀକାର କରିଛି। ଆମେରିକାର ବୈଦେଶିକ ବିଭାଗ କହିଛି ଯେ ଏଥିରେ କୌଣସି ସତ୍ୟତା ନାହିଁ। ରବିବାରର ରାଲିରେ ଇମ୍ରାନ ଦାବି କରିଥିଲେ ଯେ ତାଙ୍କ ପାଖରେ ବିଦେଶୀ ଷଡଯନ୍ତ୍ରର ପ୍ରମାଣ ଅଛି।

ପାକିସ୍ତାନର ଅନେକ ମନ୍ତ୍ରୀ ସ୍ପଷ୍ଟ କରିଛନ୍ତି ଯେ ଇମ୍ରାନ ଖାନ ଇସ୍ତଫା ଦେବେ ନାହିଁ। ବୁଧବାର ଟିଭି ଚ୍ୟାନେଲ ସହ ଏକ ବାର୍ତ୍ତାଳାପରେ ପାକିସ୍ତାନର ସୂଚନା ଓ ପ୍ରସାରଣ ମନ୍ତ୍ରୀ ଫୱାଦ ଚୌଧୁରୀ କହିଛନ୍ତି ଯେ ମ୍ୟାଚ୍ ଏପର୍ଯ୍ୟନ୍ତ ଶେଷ ହୋଇନାହିଁ। ଅନ୍ୟପକ୍ଷରେ ବିରୋଧୀ ଦଳ ନିଜ ପାଖରେ ସଂଖ୍ୟାଗରିଷ୍ଠତା ରହିଛି ଏବଂ ଇମ୍ରାନ ଖାନ ତୁରନ୍ତ ଇସ୍ତଫା ଦିଅନ୍ତୁ ବୋଲି ଦାବି କରିଛନ୍ତି। ବୁଧବାର ଦିନ ବିଲାୱାଲ ଭୁଟ୍ଟୋ କହିଛନ୍ତି ଯେ ଶୀଘ୍ର ଶାହବାଜ ସରିଫ ପାକିସ୍ତାନର ନୂଆ ପ୍ରଧାନମନ୍ତ୍ରୀ ହେବେ। ଶାହବାଜ ସରିଫ ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ୍ ସରିଫଙ୍କ ଭାଇ ।