ୟୁକ୍ରେନର ଚେର୍ନିହାଇଭରେ ରୁଷର ଏୟାର ଷ୍ଟ୍ରାଇକ୍, ୫୩ ମୃତ

କିଭ୍: ୟୁକ୍ରେନ ଏବଂ ରୁଷ ମଧ୍ୟରେ ୨୨ ଦିନ ଧରି ଚାଲିଥିବା ଯୁଦ୍ଧ ବନ୍ଦ ହେବାର ନାଁ ଧରୁନାହିଁ । ସାମରିକ କାର୍ଯ୍ୟାନୁଷ୍ଠାନକୁ ବନ୍ଦ କରିବା ପାଇଁ ଅନ୍ତର୍ଜାତୀୟ ନ୍ୟାୟାଳୟଙ୍କ ନିର୍ଦ୍ଦେଶ ସତ୍ତ୍ୱେ ରୁଷର ସେନା ୟୁକ୍ରେନର ବିଭିନ୍ନ ସହରରେ ଧ୍ଵଂସ ଓ ମୃତ୍ୟୁର ତାଣ୍ଡବ ରଚି ଚାଲିଛନ୍ତି । ୟୁକ୍ରେନ ସହରଗୁଡିକରେ ବିସ୍ଫୋରଣ ଏବଂ ଗୁଳି ବିନିମୟ ଜାରି ରହିଛି | ବୁଧବାର ଦିନ ଚେର୍ନିହାଇଭରେ ରୁଷର ଏୟାର ଷ୍ଟ୍ରାଇକରେ ୫୩ ସାଧାରଣ ନାଗରିକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଚେର୍ନିହାଇଭରେ ଓବ୍ଲାଷ୍ଟର ଗଭର୍ଣ୍ଣର ଭାୟାସ୍ଲାଭ୍ ଚାଉସ୍ ଏହି ସୂଚନା ଦେଇଛନ୍ତି।

ବୁଧବାର ରୁଷର ସୈନ୍ୟବାହିନୀ ମାରିଉପୋଲର ଏକ ଥିଏଟରକୁ ଧ୍ୱଂସ କରିଦେଇଥିଲେ ଯେଉଁଠାରେ ଶହ ଶହ ଲୋକ ଆଶ୍ରୟ ନେଇଥିଲେ ଏବଂ ଅନ୍ୟ ସହର ଉପରେ ବୋମା ମାଡ଼ କରିଥିଲେ। ତେବେ ଯୁଦ୍ଧ ଶେଷ କରିବାକୁ ବୁ ଆଲୋଚନା ପ୍ରୟାସକୁ ନେଇ ଉଭୟ ପକ୍ଷ ସକରାତ୍ମକ ସଙ୍କେତ ଦେଇଛନ୍ତି।

ୟୁକ୍ରେନର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ଏହି ଆକ୍ରମଣରେ ଏକ ସୁଦୃଶ୍ୟ କୋଠାର କେନ୍ଦ୍ର ନଷ୍ଟ ହୋଇଯାଇଥିଲା ଯେଉଁଠାରେ ଶହ ଶହ ସାଧାରଣ ନାଗରିକ ରହୁଥିଲେ। ଅନେକ ଲୋକ ଏହି କୋଠାର ଭଗ୍ନାବଶେଷ ତଳେ ଦବି ଯାଇଥିଲେ | ତେବେ କେତେ ଲୋକ ଆହତ ହୋଇଛନ୍ତି ତାହା ଏପର୍ଯ୍ୟନ୍ତ ଜଣା ପଡିନାହିଁ।

କିଭ୍ ର ମେୟର ଭିଟାଲୀ କ୍ଲିଚକୋ କହିଛନ୍ତି ଯେ ରୁଷର ଗୁଳି ମାଡ଼ରେ ସହରର ଆଖପାଖ ପୋଡିଲରେ ଅନେକ ଘର କ୍ଷତିଗ୍ରସ୍ତ ହୋଇଛି। ଏହି ସ୍ଥାନଟି ସିଟି ସେଣ୍ଟରର ଉତ୍ତରରେ ଏବଂ ସରକାରୀ ଭବନଠାରୁ ଦେଢ କିଲୋମିଟର ଦୂରରେ ରହିଛି ଯେଉଁଥିରେ ରାଷ୍ଟ୍ରପତି ଭବନ, କାର୍ଯ୍ୟାଳୟ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କାର୍ଯ୍ୟାଳୟ ରହିଛି | ଅଧିକାରୀମାନେ ଏପର୍ଯ୍ୟନ୍ତ ଆକ୍ରମଣ କିମ୍ବା ଆହତଙ୍କ ବିଷୟରେ ଅଧିକ ବିବରଣୀ ପ୍ରଦାନ କରିନାହାଁନ୍ତି। ରୁଷର ଗୁଳି ବିନିମୟ ମଧ୍ୟରେ କିଭର ବାସିନ୍ଦାମାନେ ନିଜ ଘରେ ହିଁ ନିଜକୁ କଏଦ କରି ରଖିଛନ୍ତି ଏବଂ ଗୁରୁବାର ସକାଳ ପର୍ଯ୍ୟନ୍ତ ସହରରେ କର୍ଫ୍ୟୁ ଲାଗିଛି। ଏହି ସମୟରେ ୟୁକ୍ରେନର ମେଲିଟୋପୋଲର ମେୟରଙ୍କୁ ପାଞ୍ଚ ଦିନ ଧରି ବନ୍ଧକ ରଖିବା ପରେ ରୁଷର ସେନା ମୁକ୍ତ କରିଛନ୍ତି।