ନୂଆଦିଲ୍ଲୀ: ଫିଫା ବିଶ୍ୱକପ ୨୦୨୨ ପାଇଁ ଭାରତୀୟ କମ୍ପାନୀ ବାଇଜୁସ୍ ଅଫିସିଆଲ୍ ସ୍ପନସର୍ ହୋଇଛି । ନଭେମ୍ବର-ଡିସେମ୍ବରରେ କାତାରରେ ଫିଫା ବିଶ୍ୱକପ ୨୦୨୨ ଅନୁଷ୍ଠିତ ହେବ | ଏହି ମେଗା ଇଭେଣ୍ଟ ନଭେମ୍ବର ୨୧ ରୁ ଆରମ୍ଭ ହୋଇ ଫାଇନାଲ ମ୍ୟାଚ୍ ସହ ଡିସେମ୍ବର ୧୮ ରେ ଶେଷ ହେବ | ଅଲିମ୍ପିକ୍ସ ପରେ ଫିଫା ଫୁଟବଲ ବିଶ୍ୱକପ ବିଶ୍ବର ଦ୍ୱିତୀୟ ବୃହତ୍ତମ କ୍ରୀଡା ଇଭେଣ୍ଟ ଭାବେ ବିବେଚନା କରାଯାଏ | ଫିଫା ଫୁଟବଲ ବିଶ୍ୱକପରେ ୩୨ ଟି ଦେଶ ଅଂଶଗ୍ରହଣ କରିବେ |
ଫିଫା ବିଶ୍ୱକପ ଭଳି ହାଇ ପ୍ରୋଫାଇଲ୍ ଟୁର୍ଣ୍ଣାମେଣ୍ଟର ପ୍ରାୟୋଜକ ହେବାରେ ବାଇଜୁସ୍ ହେଉଛି ପ୍ରଥମ ଭାରତୀୟ ସଂସ୍ଥା। ବାଇଜୁସ୍ ବର୍ତ୍ତମାନ ଫିଫା ବିଶ୍ୱକପ୍ ଆଇକନ୍, ପ୍ରତୀକ ଏବଂ ସମ୍ପତ୍ତିର ଅଂଶ ହେବ | ସେମାନେ ଏହାକୁ ବିଜ୍ଞାପନରେ ବ୍ୟବହାର କରିପାରିବେ | ଯେଉଁଥିପାଇଁ ଏହି ଭାରତୀୟ କମ୍ପାନୀ ସାରା ବିଶ୍ୱରେ ଫୁଟବଲ ପ୍ରଶଂସକଙ୍କ ନିକଟରେ ପହଞ୍ଚିପାରିବ | ସୋସିଆଲ ମିଡିଆରେ ଏକ ପୋଷ୍ଟ କରି ବାଇଜୁସ୍ ପକ୍ଷରୁ ଏହି ସୂଚନା ଦିଆଯାଇଛି।
ଫିଫାର ମୁଖ୍ୟ ବାଣିଜ୍ୟିକ ଅଧିକାରୀ କେ ମାଦତୀ କହିଛନ୍ତି, “ସାମାଜିକ ପରିବର୍ତ୍ତନ ଆଣିବା ଲକ୍ଷ୍ୟରେ ଫୁଟବଲର ଶକ୍ତିକୁ ବ୍ୟବହାର କରିବା ପାଇଁ ଫିଫା ଉତ୍ସର୍ଗୀକୃତ। ବାଇଜୁସ୍ ପରି ଏକ କମ୍ପାନୀ ସହ ଭାଗିଦାରୀ କରି ଆମେ ଆନନ୍ଦିତ, ଯାହା ବିଶ୍ବର ବିଭିନ୍ନ ସମୁଦାୟ ସହ ଜଡିତ ଅଛି ଏବଂ ଦୁନିଆର ଯେକୌଣସି ସ୍ଥାନରେ ଯୁବକମାନଙ୍କୁ ସଶକ୍ତ କରୁଛି |
ବାଇଜୁସ୍ ପ୍ରତିଷ୍ଠାତା ତଥା ସିଇଓ ବିଜୁ ରବୀନ୍ଦ୍ରନ୍ କହିଛନ୍ତି, “ବିଶ୍ୱର ସର୍ବବୃହତ ଏକକ କ୍ରୀଡା ଇଭେଣ୍ଟ ଫିଫା ବିଶ୍ୱକପ୍ କାତାର ୨୦୨୨ କୁ ପ୍ରାୟୋଜିତ କରିବା ନେଇ ଆମେ ଉତ୍ସାହିତ। ଭାରତକୁ ଏପରି ଏକ ବିଶ୍ୱସ୍ତରୀୟ ପ୍ଲାଟଫର୍ମରେ ପ୍ରତିନିଧିତ୍ୱ କରିବା ଏବଂ ଶିକ୍ଷା ଏବଂ କ୍ରୀଡ଼ାର ଏକୀକରଣର ଚାମ୍ପିଅନ୍ ହେବା ଆମ ପାଇଁ ଗର୍ବର ବିଷୟ | କ୍ରୀଡା ଜୀବନର ଏକ ବଡ଼ ଅଂଶ ଏବଂ ବିଶ୍ବର ବିଭିନ୍ନ ସ୍ଥାନରୁ ଲୋକଙ୍କୁ ଏକତ୍ର କରିଥାଏ | ଯେପରି ଫୁଟବଲ କୋଟି କୋଟି ଲୋକଙ୍କୁ ପ୍ରେରଣା ଦିଏ, ଆମେ ଆଶା କରୁଛୁ ବାଇଜୁସ୍ ସହ ଏହି ସହଭାଗୀତା ମାଧ୍ୟମରେ ପ୍ରତ୍ୟେକ ପିଲାଙ୍କ ଜୀବନରେ ଶିକ୍ଷା ପ୍ରତି ପ୍ରେମକୁ ପ୍ରେରଣା ଯୋଗାଇବୁ।
ବାଇଜୁସ୍ ର ବିଶ୍ବବ୍ୟାପୀ ପ୍ରାୟ ୧୫୦ ନିୟୁତ ଗ୍ରାହକ ଅଛନ୍ତି।
Comments are closed.