ଆଜି ଲୋକସଭାରେ ଆଗତ ହେବ ନିର୍ବାଚନ ସଂସ୍କାର ବିଲ୍-୨୦୨୧, ଭୋଟର ତାଲିକା ସହ ଆଧାର ଲିଙ୍କ୍ ପାଇଁ ରହିଛି ପ୍ରସ୍ତାବ

ନୂଆଦିଲ୍ଲୀ: ଆଇନ ମନ୍ତ୍ରୀ କିରେନ ରିଜିଜୁ ଆଜି ଲୋକସଭାରେ ନିର୍ବାଚନ ସଂସ୍କାର ବିଲ୍ ୨୦୨୧ ଉପସ୍ଥାପନ କରିବେ। ଏହି ବିଲ୍ ମାଧ୍ୟମରେ ଲୋକ ପ୍ରତିନିଧୀ ଅଧିନିୟମ, ୧୯୫୦ ଏବଂ ଲୋକ ପ୍ରତିନିଧୀ ଆଇନ, ୧୯୫୧ରେ ସଂଶୋଧନ କରାଯିବ। ନିର୍ବାଚନ ସଂସ୍କାର ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି କୁହାଯାଉଛି | ଗତ ବୁଧବାର କେନ୍ଦ୍ର କ୍ୟାବିନେଟ ଏହି ଆଇନରେ ସଂଶୋଧନ ପାଇଁ ମଞ୍ଜୁରି ଦେଇଥିଲା ।

ଭୋଟର ପରିଚୟ ପତ୍ର ମାମଲାରେ ସବୁଠାରୁ ବଡ ପରିବର୍ତ୍ତନ ହେବାକୁ ଯାଉଛି | ଆଜି ଉପସ୍ଥାପିତ ହେବାକୁ ଥିବା ଡ୍ରାଫ୍ଟ ବିଲ୍ ରେ କୁହାଯାଇଛି ଯେ ଭୋଟର ତାଲିକାରେ ନକଲି ଏବଂ ଜାଲ୍ ଭୋଟ୍ ରୋକିବା ପାଇଁ ଭୋଟର କାର୍ଡକୁ ଆଧାର କାର୍ଡ ସହିତ ସଂଯୁକ୍ତ କରାଯିବ। କେବଳ ଏତିକି ନୁହେଁ ଭୋଟର ତାଲିକାକୁ ଆଧାର ସହିତ ଯୋଡିବାକୁ ଏକ ପ୍ରସ୍ତାବ ରହିଛି। ସୂଚନାନୁସାରେ, ବର୍ତ୍ତମାନ ଏହାକୁ ଇଚ୍ଛାଧୀନ କରାଯାଉଛି ଅର୍ଥାତ୍ ଲୋକଙ୍କୁ ଭୋଟର କାର୍ଡକୁ ଆଧାର କାର୍ଡ ସହିତ ଲିଙ୍କ୍ କରିବାକୁ ବିକଳ୍ପ ଦିଆଯିବ |

ଚଳିତ ବର୍ଷ ମାର୍ଚ୍ଚ ୧୭ରେ ଲୋକସଭାରେ ଏକ ଲିଖିତ ଉତ୍ତରରେ ତତ୍କାଳୀନ ଆଇନ ମନ୍ତ୍ରୀ ରବି ଶଙ୍କର ପ୍ରସାଦ ସୂଚନା ଦେଇ କହିଥିଲେ ଯେ ଆଧାର ବ୍ୟବସ୍ଥାକୁ ଭୋଟର ତାଲିକା ସହିତ ଯୋଡିବାକୁ ନିର୍ବାଚନ ଆୟୋଗ ପ୍ରସ୍ତାବ ଦେଇଛନ୍ତି । ଯାହାଫଳରେ ଜଣେ ବ୍ୟକ୍ତି ବିଭିନ୍ନ ସ୍ଥାନରେ ଏକାଧିକ ଥର ପଞ୍ଜିକରଣ କରିପାରିବେ ନାହିଁ। ଦ୍ୱିତୀୟ ପରିବର୍ତ୍ତନ ହେଉଛି ନିର୍ବାଚନ ଆଇନରେ ସାମରିକ ଭୋଟରଙ୍କ ସମାନତା ସମ୍ବନ୍ଧୀୟ | ପ୍ରଚଳିତ ଆଇନ ଅନୁଯାୟୀ ଜଣେ ସେନା କର୍ମଚାରୀଙ୍କ ପତ୍ନୀ ସାମରିକ ଭୋଟର ଭାବରେ ପଞ୍ଜୀକୃତ ହେବା ଯୋଗ୍ୟ ବିବେଚିତ ହେବେ, କିନ୍ତୁ ଜଣେ ମହିଳା ସେନା କର୍ମଚାରୀଙ୍କ ସ୍ୱାମୀ ସେଭଳି ପଦବାଚ୍ୟ ହୋଇନାହାନ୍ତି। ଡାକ ବାଲଟ୍ ମାଧ୍ୟମରେ ଭୋଟ୍ ଦେବାର ସୁବିଧା ସାମରିକ ଭୋଟରଙ୍କୁ ଦିଆଯାଉଛି ଏବଂ ପ୍ରଚଳିତ ଆଇନ ଯୋଗୁଁ ସେନାର ମହିଳା କର୍ମଚାରୀଙ୍କ ସ୍ୱାମୀଙ୍କୁ ଏହି ସୁବିଧା ମିଳୁନାହିଁ ଏବଂ ସେ ଭୋଟ୍ ଦେଇ ପାରୁନାହାନ୍ତି।

ପ୍ରସ୍ତାବିତ ତୃତୀୟ ପରିବର୍ତ୍ତନ ନୂତନ ଭୋଟରଙ୍କ ସହିତ ସେମାନଙ୍କର ନାମ ଭୋଟର ତାଲିକାରେ ଯୋଡିବା ସହିତ ଜଡିତ | ପ୍ରଚଳିତ ନିୟମ ଅନୁଯାୟୀ, ଯେଉଁମାନେ ଜାନୁୟାରୀ ୧ କିମ୍ବା ତା’ପୂର୍ବରୁ ୧୮ ବର୍ଷରେ ପଦାର୍ପଣ କରନ୍ତି, ସେମାନଙ୍କୁ ହିଁ ଭୋଟର ଭାବରେ ପଞ୍ଜିକରଣ କରିବାକୁ ଅନୁମତି ଦିଆଯାଇଛି। ଉଦାହରଣ ସ୍ୱରୂପ, ଯଦି ଜଣେ ଯୁବକ ୨୦୨୨ ମସିହା ଜାନୁୟାରୀ ୨ରେ ୧୮ ବର୍ଷ ବୟସର ହୁଅନ୍ତି, ତେବେ ତାଙ୍କୁ ଭୋଟର ତାଲିକାରେ ତାଙ୍କ ନାମ ଯୋଡିବାକୁ ଜାନୁୟାରୀ ୧, ୨୦୨୩ ପର୍ଯ୍ୟନ୍ତ ଅପେକ୍ଷା କରିବାକୁ ପଡିବ | ନୂତନ ନିୟମ ଲାଗୁ ହେବା ପରେ ସେମାନଙ୍କ ନାମକୁ ଭୋଟର ତାଲିକାରେ ଯୋଡିବା ପାଇଁ ମତଦାତାଙ୍କୁ ବର୍ଷକୁ ପ୍ରତି ତିନି ମାସରେ ଗୋଟିଏ ସୁଯୋଗ ମିଳିବ ଏବଂ ଗୋଟିଏ ବର୍ଷରେ ଚାରିଟି ସୁଯୋଗ ପାଇବେ |