ବିଶେଷଜ୍ଞଙ୍କ ଚେତାବନୀ: ଜାନୁଆରୀ-ଫେବୃଆରୀରେ ଓମିକ୍ରନ୍ ମାମଲା ଦ୍ରୁତ ଗତିରେ ବଢ଼ିପାରେ

ନୂଆଦିଲ୍ଲୀ: କରୋନାର ନୂଆ ଭାରିଆଣ୍ଟ ଓମିକ୍ରନ୍ ମାମଲା ଯୋଗୁଁ ସମଗ୍ର ବିଶ୍ୱରେ ଭୟର ବାତାବରଣ ସୃଷ୍ଟି ହୋଇଛି | ଦକ୍ଷିଣ ଆଫ୍ରିକା ଠାରୁ ବ୍ରିଟେନ ପର୍ଯ୍ୟନ୍ତ, ଓମିକ୍ରନ୍ ମାମଲା ଦ୍ରୁତ ଗତିରେ ବୃଦ୍ଧି ପାଉଛି | ଜାନୁଆରୀ-ଫେବୃଆରୀରେ ଭାରତରେ ମଧ୍ୟ ଏହି ନୂଆ ଷ୍ଟ୍ରେନ୍ ମାମଲା ବୃଦ୍ଧି ପାଇବ ବୋଲି ବିଶେଷଜ୍ଞମାନେ ଚେତାବନୀ ଦେଇଛନ୍ତି । ଏହା ଡେଲ୍ଟା ଭାରିଆଣ୍ଟ ଅପେକ୍ଷା ଶୀଘ୍ର ବ୍ୟାପିବ ଓ ତୃତୀୟ ଲହରର କାରଣ ସାଜିବ ବୋଲି ବିଶେଷଜ୍ଞମାନେ ଆକଳନ କରିଛନ୍ତି |

ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଡେଲଟା ଠାରୁ ଦେଶରେ ଓମିକ୍ରନ ଅଧିକ ଦ୍ରୁତ ଗତିରେ ବ୍ୟାପିବ। ସେ କହିଛନ୍ତି ଯେ ଜାନୁଆରୀ-ଫେବୃଆରୀ ମାସରେ ଓମିକ୍ରନ୍ ମାମଲା ଅତି ଦ୍ରୁତ ଗତିରେ ବଢ଼ିବା ସମ୍ଭାବନା ରହିଛି। ତେବେ ସେ ଏହା ମଧ୍ୟ କହିଛନ୍ତି ଯେ ଡେଲଟା ଭଳି ଓମିକ୍ରନର ସେଭଳି ଘାତକ ସାବ୍ୟସ୍ତ ହେବ ନାହିଁ।

ଅଧିକାରୀ କହିଛନ୍ତି ଯେ ଓମିକ୍ରନ୍ ଉପରେ କରାଯାଇଥିବା ଅଧ୍ୟୟନରୁ ଜଣାପଡିଛି ଯେ ଏହା ବର୍ତ୍ତମାନ ସ୍ଥାନୀୟ ରୋଗ ପର୍ଯ୍ୟାୟରେ ପହଞ୍ଚିବା ପରି ମନେ ହେଉଛି ଏବଂ ଏନେଇ ଭୟଭୀତ ହେବାର କୌଣସି ଆବଶ୍ୟକତା ନାହିଁ। ଏହି ପର୍ଯ୍ୟାୟରେ ସଂକ୍ରମଣ ଶୀଘ୍ର ହେବ କିନ୍ତୁ ଏହା ଗମ୍ଭୀର ହେବ ନାହିଁ |

ବର୍ତ୍ତମାନ ପର୍ଯ୍ୟନ୍ତ ଭାରତରେ ୬୧ଟି ଓମିକ୍ରନ୍ ମାମଲା ପଞ୍ଜିକୃତ ହୋଇଛି | ମହାରାଷ୍ଟ୍ରରେ ସର୍ବାଧିକ ୨୮ଟି ଓମିକ୍ରନ୍ ମାମଲା ରହିଛି। ଦିଲ୍ଲୀରେ ଓମିକ୍ରନର ୬ଟି ମାମଲା ମିଳିଥିବା ବେଳେ ରାଜସ୍ଥାନରେ ୧୭ ଟି ଏବଂ ଗୁଜୁରାଟରେ ୪ ଟି ମାମଲା ରିପୋର୍ଟ ହୋଇଛି ।