ହକି ବିଶ୍ୱକପ: ପହଞ୍ଚିଲା ଚିଲି ଟିମ୍

ଭୁବନେଶ୍ୱର: ପୁରୁଷ ହକି ବିଶ୍ୱକପକୁ ଆଉ ୮ ଦିନ ରହିଥିବା ବେଳେ ବିଦେଶୀ ଦଳମାନଙ୍କ ଆଗମନ ଆରମ୍ଭ ହୋଇଛି । ଗତକାଲି ନେଦରଲାଣ୍ଡ୍ସ ପରେ ଆଜି (ଗୁରୁବାର) ଚିଲି ଟିମ୍ ଭୁବନେଶ୍ୱରରେ ପହଞ୍ଚିଛି । ଚିଲି ପ୍ରଥମ ଥର ହକି ବିଶ୍ବକପରେ ଅଂଶଗ୍ରହଣ କରୁଛି । କ୍ୟାପଟେନ ଫର୍ନାଣ୍ଡୋ ରେଞ୍ଚଙ୍କ ନେତୃତ୍ୱରେ ଚିଲି ଦଳକୁ ବିମାନ ବନ୍ଦରରେ ଭବ୍ୟ ସ୍ବାଗତ ଦିଆଯାଇଥିଲା ।

ଚିଲି ଗ୍ରୁପ୍ ‘ସି’ରେ ନେଦରଲାଣ୍ଡ୍ସ, ମାଲେସିଆ ଏବଂ ନ୍ୟୁଜିଲ୍ୟାଣ୍ଡ ଭଳି ଦଳ ସହିତ ସ୍ଥାନ ପାଇଛି । ଜାନୁଆରୀ ୧୪ରେ ନ୍ୟୁଜିଲ୍ୟାଣ୍ଡ ବିପକ୍ଷ ମ୍ୟାଚରୁ ଦଳ ନିଜ ଅଭିଯାନ ଆରମ୍ଭ କରିବ ।

ଦଳର ମୁଖ୍ୟ କୋଚ୍ ଜର୍ଜ ଡବଞ୍ଚ୍ ଟୁର୍ନାମେଣ୍ଟରେ ତାଙ୍କ ଦଳ ସାମ୍ନା କରିବାକୁ ଥିବା ଚ୍ୟାଲେଞ୍ଜ ବିଷୟରେ ଅବଗତ ଅଛନ୍ତି। ତଥାପି ତାଙ୍କ ଟିମ୍ ଏହି ପ୍ରତିଯୋଗିତାରେ ଚମତ୍କାର ପ୍ରଦର୍ଶନ କରିବାକୁ ସମର୍ଥ ବୋଲି ସେ କହିଛନ୍ତି ।

ସେ କହିଛନ୍ତି, “ବିଶ୍ୱକପରେ ଆୟୋଜକ ଭାରତ ସହ ଅନେକ ଶ୍ରେଷ୍ଠ ଦଳ ଅଛନ୍ତି । ଅଷ୍ଟ୍ରେଲିଆ, ବେଲଜିୟମ ଏବଂ ନେଦରଲାଣ୍ଡ୍ସକୁ ପରାସ୍ତ କରିବା ସହଜ ହେବ ନାହିଁ । କିନ୍ତୁ ଆମେ ଏହି ଟୁର୍ଣ୍ଣାମେଣ୍ଟରେ ଏହି ଶ୍ରେଷ୍ଠ ଦଳ ବିପକ୍ଷରେ ଜିତିବାକୁ ଚାହିଁବୁ।

ଡବଞ୍ଚ୍ କହିଛନ୍ତି, “ଆମେ ନିର୍ଭୀକ ଓ ପ୍ରତ୍ୟେକ ମ୍ୟାଚରେ ପୂରା ଜୋର୍ ଲଗାଇବୁ। ଦୃଢ ଇଚ୍ଛାଶକ୍ତି ଦୃଷ୍ଟିରୁ ଆମେ ପ୍ରକୃତରେ ଏକ ଭଲ ଦଳ | ଟୁର୍ନାମେଣ୍ଟର ଚ୍ୟାଲେଞ୍ଜର ସମ୍ମୁଖୀନ ହେବାକୁ ଆମେ ପ୍ରସ୍ତୁତ ।

ଦଳର ଅଧିନାୟକ ରେଞ୍ଜ କହିଛନ୍ତି ଯେ ଖେଳାଳିମାନେ ଗତ ଚାରି ବର୍ଷ ଧରି ଏକାଠି ଅଛନ୍ତି, ଯାହା ଆମକୁ ଏକ ଶକ୍ତିଶାଳୀ ଟିମ୍ ଗଠନରେ ସହାୟକ ହୋଇଛି।

ସେ କହିଛନ୍ତି, “ଆମ ଦଳ ଯୁବ ଏବଂ ଅଭିଜ୍ଞ ଖେଳାଳିଙ୍କ ଏକ ଉତ୍ତମ କମ୍ବିନେସନ୍। ଆମ ପ୍ରକୃତରେ ଏକ ଭଲ ଟିମ୍ ଏବଂ ଆମେ ଚାରି ବର୍ଷ ଧରି ଏକାଠି ଖେଳୁଛୁ | ଆମକୁ ହରାଇବା ପ୍ରକୃତରେ କଷ୍ଟକର ହେବ | ଆମେ ଏଠାରେ ଯଥାସମ୍ଭବ ଚେଷ୍ଟା କରିବୁ। ”

ଜାନୁଆରୀ ୧୪ରେ ନ୍ୟୁଜିଲ୍ୟାଣ୍ଡ ବିପକ୍ଷ ପ୍ରଥମ ମ୍ୟାଚ୍ ପରେ ଚିଲି ଜାନୁଆରୀ ୧୬ରେ ରାଉରକେଲାରେ ମାଲେସିଆକୁ ଭେଟିବ । ଏହାପରେ ଦଳ ଜାନୁଆରୀ ୧୯ ରେ ଭୁବନେଶ୍ୱରରେ ତିନିଥର ବିଶ୍ୱ ଚାମ୍ପିଅନ୍ ନେଦରଲାଣ୍ଡ୍ସ ସହ ଶେଷ ଗ୍ରୁପ୍ ମ୍ୟାଚ୍ ଖେଳିବ।